我们都知道金瓜是崇明的特产之一，是崇明人餐桌上最朴实的小菜。而在作家陆茂清笔下，这简简单单的金瓜也染上了浓浓的乡愁！

大家裁晓得，金瓜是我里崇明岛浪有名个土特产。弗是呒得根据个瞎话，勒勒上海地区，金瓜只有我里崇明有，连搭近边个江苏省、浙江省也呒得个。

6月下半月开始，交关乘车勿要铜钿的老伯伯老妈妈，隔洋过海来崇明买金瓜，有个背勒肩家浪，有个拎勒手里厢，还有个装勒厢车里，买子弗算数，还要先尝尝勒。有个来岛浪“农家乐”孛相个朋友对我活，吃饭个辰光点子一只拌金瓜丝，扎腊金黄，香味直窜鼻头管，叫人馋唾水直咽，三代人个筷子抢着伸出去，鹅嘈鸭嘴“真崭”，裁话“再来一盆”。

旧年我跑亲眷到闵行，带子去几个眼眼上市个金瓜，亲眷高兴来拗去话夷，讲夷特革墩是呒得金瓜个，稀奇煞个，作账转送拨新攀个亲家公勒。看来我拿金瓜当礼品送人送对特，虽算弗大值钞票，不过勒勒主人家个眼里，要赛过保健品勒！

《上海名特优农产品大观》革本书里，拿崇明金瓜话勒好来落，叫做“植物海蜇”，营养价值高，低热量天然健康食品。

为何讲金瓜是天然健康食品呐？听农科专家话，崇明岛三面是江，一面是海，水、地皮、空气干净，金瓜生长期间基本上呒得虫害，病害也少，一般情况弗用农药个，拨勒人吃个金瓜丝，包勒勒硬绷绷韧牵牵个皮里厢，弗会得污染，革落比别个蔬菜来勒清爽。再讲金瓜里个丙醇二酸有次派减肥用场，夷爱含有别样蔬菜里呒得个葫芦巴硷，革是有抗癌作用个勒！

崇明岛浪个传统，乡下头差勿多家家人家有得金瓜种，勒勒房前、屋后、山头边，搭子五棚脚跟头沉几粒金瓜籽，让夷自生自长，用勿着专门培管个，瓜藤自会得爬勒一世啦界，东一只西一只滚满子大大小小个金瓜，到子夏天末逐点老特，当子种田人牵常吃个家常菜。

岛浪弗少人家裁有囥金瓜的习惯。像老酒越陈越香一个意思，采下来个金瓜囥子一段辰光，变勒更加老结，吃勒嘴里更加脆嫩，搭子眼眼采下来个一样鲜洁爽口。再讲冷天进入蔬菜淡季，囥勒勒个金瓜正好派用场特。

秋九八月到乡下走一走转一转，弗少人家拿金瓜靠勒阶沿浪、墙脚跟头，或者挂勒屋檐底下，一排排金黄铮亮，喜见人来带生吃得进。我住勒城里厢，年年也要觅几只好点个金瓜，想办法囥到过年，用来招待外头来个客人，让夷特尝尝崇明“植物海蜇”个好滋味。客人听我介绍，晓得寒冬腊月吃着鲜金瓜是弗轻容易个，心里邪气乌心。

金瓜个吃法以凉拌为主，方法是蛮便当个。

讲是便当，真正拌起来弗是裁做得好个。去岛外望望老朋友，带去崇明金瓜蛮受欢迎，但好几趟反客为主，要我革个客人动手拌金瓜丝。夷特话落，以前也拌过个，就是烂笃笃弗成丝，呒吃头。我于是边做边话里厢个门槛，拌好后端到台子浪，色、香、形、味裁是刮刮叫，一歇息吃特来碗底朝天精光白叶！

朋友对我话，城里人裁喜欢吃金瓜丝，拌勿好个人蛮多，你最好写篇文章介绍介绍，让大家学学。我想革倒是应当个，就写子一篇《巧拌金瓜丝》投勒《新民晚报》，弗多几天就登出来特。

崇明岛浪传说，金瓜里交交关关个丝头，就像对亲人无穷无尽个思念。革种情结勒勒回乡个台湾同胞身浪是蛮明显个。

我当对台宣传通讯员有好几年特，搭子勒勒台湾个崇明人碰头蛮多，夷特年纪轻轻离开崇明，日思量夜做梦几十年，到底望着子回乡个机会特。转来子交关喜欢吃家乡菜，金瓜是呒次少个，而且吃子爱要吃。夷特话落，勒勒台湾想吃吃勿着，转来子要吃个煞念。

姓黄个台胞头一趟转来，专门拍子一张吃金瓜个照片：吃饭台子浪放着两只大金瓜，爱有满满泛泛一碗拌金瓜丝，黄老先生左手托子一只金瓜，右手夹子一筷金瓜丝朝嘴里送，眉开眼笑，一面孔个写意舒齐。

夷回台湾去个辰光，带子一包金瓜种子，送勒勒勒台湾个崇明同乡，因为要个人忒多特，一个人只有六粒，送完为止。夷爱勒勒台北崇明同乡会会刊《乡情报道》浪写文章话，崇明个金瓜，牵常吃有益健康，有益长寿，革种植物海蜇皮，是我里故乡崇明岛独有个！

作家简介

陆茂清

陆茂清，男，年生，上海市作家协会会员、上海市民间文艺家协会会员、崇明县文史研究会副会长、崇明县民间文艺家协会理事，笔名瀛洲居、梅青、茂钦。主要作品有《民国要闻要案录》《卢沟桥事变》《：蒋介石永别大陆》《汪伪第一夫人的最后岁月》《徐焕升——“人道远征”日本的空中骄子》《沙洲奇葩——崇明特色农副产品集萃》等。

手机菜场

点击